NIATRIKA FIOFANANA MIKASIKA NY FAHAIZA-MITARIKA NA “LEADERSHIP” NY TANORA APOKALYPSY

 

Fotoana tsy voakosoka !

Ho tadidy tsy azo kosehina rahatrizay eto anivon'ny Fikambanana Apokalypsy ny zavatra nitranga tao amin'ny EPP 67ha Atsimo tamini'ity volana septambra 2011 ity.  Voalohany indrindra teto anivon'ny fiangonana Apokalypsy mantsy ny fisian'ny fanomezana fiofanana sy fianarana mikasika ny fahaiza-mitarika na leadership. Ny tanora no nahazo fiofanana voalohany mikasika izany « fahaiza-mitarika » izany, ka ankasitrahana feno ry zareo mpikarakara dia ny Biraon'ny Tanora Rezionaly Antananarivo.

 

Tsy ho toy ny taloha intsony

Tsy ho toy ny taloha intsony ny hoavy hoy ny Vice Pdt Rezionaly Antananarivo, Loh RAVONJY, raha nandray fitenenana nanokatra ny fiofanana izy, satria ny raiamandrenin'ny zanak'Israely tany anefitra hoy izy dia tsy nanana planina fa nanaraka ampilaminana ny andry afo sy andry rahona hatrany fotsiny, Fa rehefa hiditra ny tany Kanana kosa anefa dia tsimaintsy nisy ny planina sy teknika marosamihafa nampiharina ka mifanojo indrindra amin'izao fianarana  ny teknika "leadership" izao indrindra izany rehetra izany. Marina tokoa fa manaraka hatrany ny voasoratra ny zavatra iainan'ny fiangonan'Andriamanitra. Ny Loh RATSIMIZAO filoha Nasionalin'ny Tanora Apokalypsy kosa dia nisaotra sahady ny mpikarakara ny hetsika ary namporisika ny tanora mba ho mendrika hatrany amin'ny maha "hoavin'ny fikambanana" azy. Ny Filoha WILLIAM Tonia Nasionaly skoto TOM indray moa dia namaky tononkalo mihintsy…

 

Tsy omby ny efitrano , tsy ampy ny seza!

Tonga maro ireo mpiofana, satria maherin'ny zato, ary mbola nitombo ny isan'izireo tamin'ny andro faharoa ka dia nambara mihintsy hoe tsy misy olona hafa afaka miditra intsony amin'ny andro fahatelo sady farany.

 

Ho ahy manokana dia roa andro ny anjara fotoana nanofanako ary nety tamiko tokoa izay (Ny ahy no be indrindra, satria telo andro ilay fiofanana) Afaka nampianatra lesona vitsivitsy nifampitohy mihintsy aho, lesona izay nalaiko tao amin'ny boky nosoratako ihany. Ampolony maro kosa ireo olona nangataka hividy ny boky ka dia nomena fahafaham-po izireo na dia mbola tsy vitako "tsara" aza ilay boky.

 

Tamin'ny andro faharoa niofanana, dia dimy ambin'ny telopolo ambin'ny zato (135) ny isan'ireo olona tonga nanatrika ny fiofanana, feno hipoka ny trano, ary tsy ampy ny seza, ka na dia natokana hoan'ny tanora aza ny fiofanana dia nisy ireo raiamandreny loholona izay tonga niofana ihany koa, (somary sahirana ihany aho tamin'ny voalohany satria sarotra be ny mampiasa voambolana hoan'ny tanora teo anatrehan'ireo raiamandreny hajaina ireo) kanefa dia nizotra antsakany sy andavany ihany ny fiofanana ary "ao tsara" ihany ny "ambiance" nony kelikely (nentina nandravaka sy nanazavana ny vontoatin'ny lesona ihany koa moa ny hatsikana sy tantara mampihomehy isan-karazany).

 

Tena maha te hidera ny faniriana hianatra sy hiofana izay nasehon'ireto tanora sy mpitarika tanora eto anivon'ny rezionaly Tana ireto, nahitana ny zoky skoto tomima sy orima, ny rantsana Oliva, ny mpitarika sampana tanora , ny mpitarika chorale, ny Asafi, ny olon-tsotra marobe ihany koa tonga niofana tao.

 

Tsy ampy ny fotoana:

Tena tsy ampy ny fotoana, na izany aza anefa dia efa lesona fototra mikasika ny "leadership" mihintsy no azon'ireo mpiofana ireo, ary nohazavaina tamin'ny antsipirihany tokoa , ka ahafahany sahady miatrika ireo adidy miandry azireo eo anivon'ny fiangonana sy ny fiaraha-monina misy azy.

 

Mino koa aho fa ny lesona izay atolotry ny Sekretera Jeneraly Nasionaly James Chapard, dia hanampy betsaka ireto mpiofana ireto. Misaotra Tonton Chapard a!

Ny ho tohin'ny fiofanana izao no apetraka amin'ny Ray.

Diary anio 13 Septambra 2011 => Zoky Andry!